« Galerianu », di u gruppu Vaghjime

S’aspittava ssu dischettu novu dipoi un pezzu ! Hè isciutu calchì ghjornu fà, u cinquesimu di u gruppu suttanacciu.

« Linea », eccu u so nomu, simbulizeghja l’andatura sempri diritta ch’ellu hà avutu è ch’ellu t’hà sempri Vaghjime dipoi a so criazioni, è canzoni di prima trinca chì ani fattu u so successu com’è « Voce d’oghje è di dumane », « Solu » o ancu « A nutizia ».

Quindeci canzoni tessini u filu di ssa « Linea », cù temi inghjiru à a Corsica, a sulidarità, i cosi di a vita, a storia…

I testi, tutti inghjinnati da a piuma di u leader di u gruppu, Antoine Crescenzi, chì faci sempri un veru travaghju di ricerca, mischjani torna simplicità è sincerità.

I musichi, criati da sfarenti membri di u gruppu, sò stati accunciati da un cumpagnu di sempri, Mighè Tomei, è l’anzianu pianistu d’I Muvrini è di Felì, Francis Rezoagli.

Un culori musicali à volta tradiziunali è mudernu, senza scurdassi di ciò chì faci a specificità di Vaghjime, l’influenzi di l’America Suttana.

Pà ss’opara musicali nova, avariami pussutu sceglia parechji tituli com’è « U passu di Natale », un umaghju tremendu à u militanti puliticu è culturali Natale Luciani, fundatori cù tant’altri di Canta u Populu Corsu è criatori di a famosa « Scola di Cantu » in Aiacciu.

Ma i nostri arechji è u nostru cori si sò firmati annant’à quilla chì apri u dischettu « Linea », a prima, chì si chjama « Galerianu ».

Hè versu l’annu 700, sicondu i stimazioni di i sturiani chì i primi mori sò ghjunti in Corsica cù un scopu maiò, arrubà è arricchisciasi grazia à u cumerciu di i schjavi.

Una canzona chì conta dunqua a storia di un corsu mandatu in galera, l’avareti capita.

Pocu affari à dì annant’à i parolli, bè scelti è chì facini chì ssa canzona t’hà tutti l’ingredienti par essa una di i più famosi o a più famosa di u dischettu.

Listessu affari pà a musica, cù un ritimu piacevuli, accordi simplici à sunà pà tutti quilli chì vulariani cantà ssa canzona in sirata par asempiu, un’armunia ghjusta di i voci, è sempri ssi culori sudamericani chì ci facini viaghjà d’una certa manera à noi dinò à mezu à ssa galera, ma senza u fastidiu ch’elli ani pussutu cunnoscia ssi povari corsi, ancu di grazia !

Una bella riescita, è un titulu chì ùn ci stancaremi mai d’ascultà, sicuramenti.

Vaghjime - Galerianu (strattu di 39 sicondi).